«Սպորտինգ»-«Արսենալ». խմբի կենտրոնական խաղը

Եվրոպայի լիգայի E խմբի կենտրոնական խաղում «Սպորտինգը»  կհյուրընկալի «Արսենալին»: Կկարողանա՞ թիմերից մեկը հաղթանակ տոնել խմբի կենտրոնական խաղում:

«Սպորտինգ»

Եվրոպա լիգայի խմբային հատվածում երկու փուլերից հետո պորտուգալական թիմը խմբում զբաղեցնում է 2-րդ հորիզոնականը և իր առաջիկա մրցակից «Արսենալին» զիջում է միայն լրացուցիչ ցուցանիշներով: Խմբի մյուս թիմերին պորտուգալական ակումբը հաղթել է 2:0 և 2:1 հաշիվներով:

Ընդհանուր առմամբ, «Սպորտինգը» բավական հաջող է խաղում տանը, այդ թվում՝ նաև կարող է խնդիրներ ստեղծել եվրոպական գրանդների համար սեփական դաշտում: Եվրոպայի լիգայի վերջին 6 խաղերում պորտուգալացիները պարտվել են միայն  «Բայերին» (0:1):

Այս խաղին հարցականի տակ է միայն պաշտպան Ռաֆինյայի և կիսապաշտպան Բաս Դոստայի մասնակցությունը: Մյուս ֆուտբոլիստները պատրաստ են դիմակայությանը:

«Արսենալ»

Լոնդոնյան ակումբն այս մրցաշրջանն այնքան էլ հաջող չսկսեց, բայց հիմա մեծ թափ է հավաքել: Զինագործները հաղթում են խաղը խաղի հետևից:

Եվրոպայի լիգայում երկու տուրերում «Արսենալը» ևս խնդիրներ չունեցավ: Սկզբում լոնդոնյան ակումբը վստահորեն հաղթեց «Վորսկլային» `4:2 հաշվով, որից հետո 3 անպատասխան գնդակ ուղարկեց «Ղարաբաղի» դարպասը:

Այս խաղում հարցականի տակ է Նաչո Մոնրեալի և Սաեդ Կոլաշինացի մասնակցությունը: Արդեն վաղուց թիմի լազարեթում են Կարլ Ջենկինսոնը, Կոնստանտինոս Մավրոպանոսը և Լորան Կոսելնին:

Վիճակագրություն

«Սպորտինգը» հաղթել է վերջին 5 տնային խաղերում

«Արսենալը» հաղթել է վերջին 10 խաղերում անընդմեջ

«Սպորտինգը» լավ հնարավորություն ունի խանգարելու հյուրերի պլանները սեփական հարկի տակ, քանի որ սեփական դաշտում  թիմը միավորվում է գրեթե յուրաքանչյուր պայքարում: «Արսենալն» արդեն շատ լավ մարզավիճակում է:  Թիմը շատ է կենտրոնանում հարձակման վրա, ինչն էլ երբեմն պատճառ է դառնում սեփական դարպասը գնդակ ընդունելու համար:

Վերլուծաբանները կարծում են, որ այս խաղը լինելու է կա՛մ շատ գոլառատ, կա՛մ ձանձրալի: Առաջին տարբերակն ավելի հավանական է: Սակայն մի բան հստակ է՝ երկու թրիմերն էլ անելու են ամեն ինչ խմբում առաջատար դառնալու համար:

Հիշեցնենք, որ Եվրոպա լիգայի խմբային փուլի «Սպորտինգ»-«Արսենալ» հանդիպումը կկայանա այսօր՝ Երևանի ժամանակով 21:00-ին:

Սիրարփի Աղաբաբյան