«Համահայկական հիմնադրամում ստուգումները շարունակվում են, բայց, ամենայն հավանականությամբ, գումարների հետ որևէ բան չի եղել». Փաշինյան
Այսօր Բեյրութում ՀՀ վարչապետի պաշտոնակատար Նիկոլ Փաշինյանի և լիբանանահայ համայնքի հանդիպման ժամանակ ՀՅԴ ներկայացուցիչ, Համահայկական հիմնադրամի հոգաբարձուների խորհրդի անդամ Նազարե Սապունջյանն առաջարկեց մեխանիզմ ներդնել, որ յուրաքանչյուր հայ կարողանա թեկուզ մեկ դոլարով պարբերաբար աջակցել հայրենիքին ու դրանով իրեն հայ զգա:
Ն. Փաշինյանը պատասխանեց, որ թեկուզ չանեն էլ, յուրաքանչյուրը հայ է, Հայաստանի մասնիկ է: Նա կոչ արեց վստահությամբ վերաբերել Համահայկական հիմնադրամին.
«Ստուգումները շարունակվում են, բայց, ամենայն հավանականությամբ, գումարների հետ որևէ բան չի եղել: Ես կոչ եմ անում՝ եթե որևէ անվստահության էջ եղել է, փակել այդ էջը և մենք պետք է նոր շունչ տանք Համահայկական հիմնադրամին»:
Փաշինյանը հավելեց, որ աշխատում են, հնարավոր է, որ մեխանիզմ ներդրվի, որպեսզի ցանկացողների բանկային քարտով ամսական իրենց նշած չափով ավտոմատ փոխանցում արվի:
«Թափանցիկությունն ամենակարևորն է, վստահությունը, եղբայրության զգացումը»,- ասաց Ն.Փաշինյանը՝ հույս հայտնելով, որ Հայաստան-Սփյուռք հարաբերությունները հիմնված կլինեն առաջին հերթին վստահության վրա, իսկ փողը տեխնիկական հարց է:
Լիբանան-Երևան
