«Այսօր էլ գլուխս բարձր ասում եմ, որ աշխատելու եմ նոր Հայաստանում». Հունան Պողոսյան
ՀՀ վարչապետի պաշտոնակատար Նիկոլ Փաշինյանը Սյունիքի մարզպետարանում հոկտեմբերի 19-ին ներկայացրեց նորանշանակ մարզպետ Հունան Պողոսյանին: Փաշինյանը նշեց, որ եթե Երևանը Հայաստանի գլուխն է, ապա Սյունիքը ողնաշարն է:
Լսելով հանդիպմանը ներկա համայնքների ներկայացուցիչներին, Փաշինյանն ուրախությամբ փաստեց, որ նախորդ հանդիպումից հետո մի շարք խնդիրներ իրենց լուծումն են ստացել:
«Մեր վերջին հանդիպմանը մենք մի քանի հարցեր ենք քննարկել: Պետք է նշեմ, որ Մեղրիի մանկապարտեզի վերանորոգման համար: Ֆինանսավորումն արդեն առկա է ամբողջությամբ»,- նշեց նա:
Սյունիքի նորանշանակ մարզպետ Հունան Պողոսյանը շնորհակալություն հայտնեց վարչապետին և կառավարությանը բարձր վստահության համար: «Ես ասել եմ և այսօր էլ գլուխս բարձր ասում եմ, որ աշխատելու եմ նոր Հայաստանում և մեծ սիրով ընդունել եմ այս առաջարկը: Մնացածն արդեն կյանքը ցույց կտա»,- ասաց Պողոսյանը:
ՀՀ տարածքային կառավարման և զարգացման նախարարի պաշտոնակատար Սուրեն Պապիկյանն էլ համայնքների ներկայացուցիչներին ներկայացրեց այն ընթացիկ ծրագրերը, որոնք առաջիկայում իրականացվել, կամ իրականացվելու են մարզում:
Պապիկյանը նշեց, որ միայն Կապան քաղաքի բազմաբնակարան շենքերի տանիքների վերանորոգման համար կառավարության կողմից հատկացվել է 253 միլիոն դրամ գումար:
«Նախագծա-նախահաշվային փաստաթղթերն արդեն իսկ ավարտական փուլում են, մնացել են փաստաթղթավորման խնդիրները: Կապանի կամուրջի հիմնանորոգման համար 24 միլիոն դրամ է հատկացվել»,- ընդգծեց նախարարը:
Նա շեշտեց, որ ֆինանսավորման հիմնական շեշտը դրվել էր Կապան խոշորացված համայնքի վրա, քանի որ մնացած բազմաբնակավայր համայնքներն հիմնականում իրենց տարածքներում ունեն հանքավայրեր, որոնք փոքրիշատե օգնում են համայնքներին:
Հանդիպում Սյունիքի մարզպետարանում։
Gepostet von Nikol Pashinyan / Նիկոլ Փաշինյան am Freitag, 19. Oktober 2018
