Հունան Պողոսյանը «սիրով» է ընդունել է Նիկոլ Փաշինյանի առաջարկը՝ զբաղեցնել Սյունիքի մարզպետի պաշտոնը
Նախկին փոխոստիկանապետ, ոստիկանության գեներալ-լեյտենանտ Հունան Պողոսյանը «սիրով» է ընդունել է Նիկոլ Փաշինյանի առաջարկը՝ զբաղեցնել Սյունիքի մարզպետի պաշտոնը: Այսօր կառավարության նիստից առաջ լրագրողների հետ զրույցում Հ.Պողոսյանը հիշեցրեց, որ որպես փոխոստիկանապետ 8 տարի պաշտոնավարել է և իրեն կարճ դադար էր պետք:
«Կարճ դադարը եղավ, ես հիմա մեծ սիրով ընդունել եմ այս առաջարկը», – ասաց նա։
Նախկին ոստիկանը վստահեցրեց, որ ինքը նոր Հայաստանի կողմնակից է ու ամեն ինչ անելու է, որ այդ նոր Հայաստանում լավ լինի:
Նա հավաստիացրեց, որ նախկին իշխանությունների օրոք էլ ինքը, ծառայելով օրենքին, միշտ ժողովրդին է ծառայել։ Հ.Պողոսյանը նշեց, որ մարզում առաջնային խնդիրներից է լինելու փոխվստահության մթնոլորտի ձևավորումը։
