Տեղի ունեցած ծեծկռտուքի պատճառով այսօր Շոշ գյուղում ճանապարհ են փակել
Այսօր՝ սեպտեմբերի 20-ին, վաղ առավոտից մի խումբ երիտասարդներ փակել էին Ասկերանի շրջանի Շոշ գյուղից դեպի Հադրութ տանող ճանապարհը:
«Արցախպրես»-ի թղթակցի հետ զրույցում Ասկերանի շրջանի Շոշ համայնքի ղեկավար Էրիկ Աբրահամյանը նշել է, որ պատճառը եղել է մի քանի օր առաջ իր համագյուղացի Սողոմոն Մելքոնյանի հետ տեղի ունեցած միջադեպը:
«Ես դեպքի վայրում չեմ եղել: Բայց ըստ պատմածի, Սողոմոն Մելքոնյանին ծեծի են ենթարկել մի խումբ երիտասարդներ, որոնցից մեկը եղել է Արցախի զինկոմիսար Մխիթար Ավշարյանի որդին: Ներկայումս ոստիկանությունը զբաղվում է այդ հարցով»,-ասել է մեր զրուցակիցը՝ ավելացնելով, որ, ի նշան բողոքի, մի խումբ երիտասարդներ և համագյուղացիներ այսօր մոտ կես ժամով փակել էին Ստեփանակերտ-Հադրութ մայրուղու Շոշի հատվածը:
Համայնքի ղեկավարի խոսքով՝ ցուցարարների հետ բանակցել են ոստիկանության աշխատակիցները, ինչի արդյունքում և այն բացվել է:
Մեզ հետ հեռախոսազրույցում Արցախի զինկոմիսար Մխիթար Ավշարյանը հաստատեց այն իրողությունը, որ տեղի ունեցած ծեծկռտուքին մասնակցել է նաև իր որդին, սակայն հրաժարվեց այլ մանրամասներ հաղորդելուց՝ նշելով, որ դրանով զբաղվում են իրավապահ մարմինները:
Իսկ տուժող կողմ հանդիսացող Սողոմոն Մելքոնյանը մեզ հետ հեռախոսացրույցում հրաժարվեց միջադեպի հետ կապված մանրամասներ հաղորդել՝ պատճառաբանելով, որ թեմայի մասին կխոսի ավելի ուշ՝ դեմ առ դեմ հանդիպման ժամանակ:
