Թրամփը չեղարկեց Փոմպեոյի այցը Փհենյան՝ ԿԺԴՀ-ից ստացված ագրեսիվ նամակի պատճառով. WP
ԱՄՆ-ի նախագահ Դոնալդ Թրամփը որոշել է չեղարկել պետքարտուղար Մայքլ Փոմպեոյի այցը ԿԺԴՀ այն բանից հետո, երբ նրան են հանձնել Կորեայի Աշխատանքային կուսակցության միասնական ճակատի բաժնի վարիչ Կիմ Յոն Չհոլի նամակը:
Օգոստոսի 27-ին այս մասին հայտնել է The Washington Post թերթը՝ վկայակոչելով ԱՄՆ-ի նախագահի վարչակազմի աղբյուրներ։ Թերթի տվյալներով՝ ուղերձը, որը Թրամփին է հանձնել Փոմպեոն, գրված է եղել «ագրեսիվ ձեւով»:
Նամակի բովանդակությունը չեն հայտնում: Ավելի վաղ Թրամփը Փոմպեոյին խնդրել էր հրաժարվել այս շաբաթ ԿԺԴՀ պլանավորված այցից, քանի որ Վաշինգտոնը բավականաչափ առաջընթաց չի տեսնում Կորեական թերակղզու միջուկազերծման գործընթացում, հաղորդել է ՏԱՍՍ-ը:
