«Ամբողջ Գյումրին քանդել ենք, սարքում ենք». Սամվել Բալասանյանը չի պատրաստվում հրաժարական տալ

Գյումրու քաղաքապետ Սամվել Բալասանյանը չի պատրաստվում հրաժարվել իր պաշտոնից, իսկ ավագանու կողմից իրեն անվստահություն հայտնելը պարզապես ստուգում է համարում։ Այսօր լրագրողների հետ զրույցում Ս.Բալասանյանը հայտարարեց, թե այդ ստուգումը ցույց տվեց, որ ինքը վստահություն ունի։

Դիտարկմանը, որ նա չի վայելում գյումրեցիների վստահությունը, Ս.Բալասանյանը հակադարձեց. «Ո՞վ է ասել ձեզ։ Եթե գյումրեցիներն ուզեն, մի պահ չեմ սպասի, միանգամից հրաժարական կտամ, որևէ խնդիր չունեմ ես»։

Ս.Բալասանյանը հայտարարեց, թե հրաժարական կտա նաև իշխանության պահանջի դեպքում, ինքն աթոռից կառչած չէ, խոշոր ծրագրեր է իրականացնում, իսկ որևէ չարաշահման մասին անգամ խոսք չի կարող լինել. «Ամբողջ Գյումրին քանդել ենք, սարքում ենք»։

Գյումրու քաղաքապետը պատրաստակամություն հայտնեց, որ ԱԱԾ-ն նաև իրենց մոտ ստուգումներ իրականացնի. «Ես բիզնեսների հետ կապ չունեմ։ Ես 99 թվականից «Գյումրի գարեջուր» երևի 4 անգամից ավել մտած չեմ լինի»։ Նա բնական համարեց, որ ընկերությունը պատկանում է իր ընտանիքին, ու հարցադրում արեց. «Ի՞նչ, իրավունք չունի՞ իմ որդին բիզնես ունենալու»։

Հայաստանում իշխանափոխության փաստը Ս.Բալասանյանը շատ լավ է գնահատում. «Ամսի 24-ին ես ողջունել եմ, որ երիտասարդը դուրս եկավ ու տեր է կանգնում իրեն երկրին։ Սրանից լավ բան ո՞րն է»։

Մանրամասները՝ տեսանյութում