Հայաստանի ներքին զբոսաշրջությունն աճել է 22%-ով
2018 թվականի հունվար-մարտին Հայաստանի ներքին զբոսաշրջիկների թիվը կազմել է 111 888 մարդ։ Այս մասին տեղեկացնում է ՀՀ Ազգային վիճակագրական ծառայությունը։ 2017 թվականի նույն ժամանակահատվածի համեմատ ներքին զբոսաշրջությունն աճել է 22%-ով։
Նշենք, որ ներքին զբոսաշրջության գնահատման համար ԱՎԾ-ն հիմնվում է ՄԱԿ-ի զբոսաշրջության համաշխարհային կազմակերպության մեթոդաբանության վրա, ըստ որի՝ ներքին զբոսաշրջիկ է համարվում ցանկացած անձը, որը ճանապարհորդում է իր հիմնական բնակության վայրի երկրի սահմաններում (սովորական բնակության միջավայրից դուրս), այսինքն որևէ երկրի բնակիչների ճանապարհորդությունը իրենց իսկ երկրում կամ հիմնական բնակության երկրում, անկախ ճանապարհորդության նպատակից (բացի ուսման նպատակով) ոչ պակաս քան 24 ժամ և ոչ ավել քան անընդմեջ 1 տարի ժամանակով և ճանապարհորդության գլխավոր նպատակը չի հանդիսանում գործունեությամբ զբաղվելը, որի համար վճարվում է այցելած վայրում:
Բերված տվյալներն արտացոլում են հյուրանոցային տնտեսության օբյեկտներում (հյուրանոցներ, հյուրանոցատիպ հանգրվաններ, առողջարաններ, հանգստյան տներ և այլն) հաշվառված զբոսաշրջիկներին:
