«Նիկոլ Փաշինյանի թիմի հետ քաղաքական պատասխանատվություն կիսելու պատրաստակամություն չունեմ». Վիգեն Սարգսյան
ՀՀ պաշտպանության նախարարի պաշտոնակատար Վիգեն Սարգսյանը վստահ է՝ Նիկոլ Փաշինյանն ազնիվ մղումներով փորձելու է անել իր ուժերի առավելագույնի չափով երկիրը դեպի բարեկեցություն տանելու քայլեր։
«Բազմաթիվ սպասումներ կան իր առաջիկա անելիքների հետ կապված։ Ես մաղթում եմ հաջողություն և հաղթանակներ Նիկոլ Փաշինյանին։ Նա իր ուսերին ծանր բեռ վերցրած մարդ է, բայց հուսանք, որ ազնվությունն ու ձգտումը կօգնեն լուծել այդ բարդ խնդիրները»,- այսօր լրագրողների հետ հանդիպման ընթացքում ասաց Վիգեն Սարգսյանը։
Գործադիրում ցանկացած պաշտոն զբաղեցնելու վերաբերյալ առաջարկ Վիգեն Սարգսյանը չի ընդունելու. «Չի կարող լինել պաշտոն՝ առանց գաղափարախոսության։ Ես բացառում եմ, որ արհեստավարժությունով կարելի է գերակշռել քաղաքական պատասխանատվության հարցը։ Դա նշանակում է, որ ես Նիկոլ Փաշինյանի թիմի հետ քաղաքական պատասխանատվություն կիսելու պատրաստակամություն չունեմ»։
