Դավիթ Բաբայանը՝ Ադրբեջանի ակտիվացման մասին
«Հակառակորդն ուշի-ուշով հետևում է հայաստանյան իրադարձություններին, և չի բացառվում, որ փորձի այդ առիթով օգտվել։ Դա մեկ անգամ չէ, որ եղել է։ Պետք է պարզապես աչալուրջ լինել, հատկապես՝ մեզ նման երկրի համար, որն ունի այդքան բարդ իրավիճակ՝ աշխարհաքաղաքական առումով»,- 168.am-ի հետ զրույցում ասաց Արցախի Հանրապետության նախագահի մամուլի խոսնակ Դավիթ Բաբայանը՝ պատասխանելով հարցին՝ արդյո՞ք Ադրբեջանի ակտիվացումը պայմանավորված է հայաստանյան իրադարձություններով։
Ապրիլի 21-ի ժամը 14:25-ից սկսած արցախաադրբեջանական հակամարտ զորքերի շփման գծում հակառակորդը տարբեր տրամաչափի զինատեսակներից ինտենսիվորեն խախտում է հրադադարի պահպանման ռեժիմը: Բացի հրադադարի ռեժիմի խախտումներից, շփման գծի տարբեր հատվածներում, մասնավորապես՝ արևելյան և հարավ-արևելյան ուղղություններում, նկատվում են ադրբեջանական բանակի կենդանի ուժի և զինտեխնիկայի ակտիվ տեղաշարժեր:
Դավիթ Բաբայանն ասաց, որ հիմա բանակը կրկնակի աչալուրջ է, այդ տեղաշարժերին հատուկ ուշադրություն են դարձնում։
Հարցին՝ հնարավո՞ր է՝ Ադրբեջանն օգտվի Հայաստանում ստեղծված իրավիճակից և դիմի ռազմական գործողությունների, նա պատասխանեց, որ ամեն ինչ հնարավոր է. «Ամեն ինչ կախված է նրանից, թե ինչպես կզարգանան այդ բոլոր գործընթացները։ Մենք ուզում ենք, որպեսզի նորմալ, օրենքի սահմաններում հարցը լուծվի, ինչպես նախագահ Սահակյանն է իր կոչում դիմել։ Երբևիցե չպետք է մոռանանք արտաքին վտանգի մասին, ինչպես կոչում է նշված՝ դա չի կարող չանդրադառնալ, փաստ է»։
Դավիթ Բաբայանն ասաց, որ այս պահին իրավիճակը վերահսկելի է. «Այդ տեղաշարժը նկատելի է, հետևում ենք, տեսնենք։ Ամեն ինչ վերահսկվում է»։
