Մարկո Ռոյսը հետաքրքրում է «Լիվերպուլին» և «Տոտենհեմին»
Դորտմունդի «Բորուսիայի» կիսապաշտպան Մարկո Ռոյսը կարող է տեղափոխվել Անգլիա: Դորտմունդի «Բորուսիայի» ավագը միայն վերջերս է վերականգնվել ծանր վնասվածքից և վերսկսել է ելույթները թիմի կազմում:
Ըստ բրիտանական Mirror պարբերականի՝ «Բորուսիայի» ավագի ծառայություններով հետաքրքրված են 2 անգլիական թոփ-ակումբներ՝ «Լիվերպուլը» և «Տոտենհեմը»:
Ֆուտբոլիստի գործող պայմանագիրն ակումբի հետ նախատեսված է մնչև 2019 թվականը: Ակումբի ղեկավարությունն արդեն սկսել է բանակցությունները պայմանագրի երկարաձգման վերաբերյալ: Ռոյսն ինքը դրական է վերաբերվում նոր պայմանագրին, բայց դրա հետ մեկտեղ, ուզում է պայքարել տիտղոսների համար, ինչն ակումբը չի կարող երաշխավորել:
«Տոտենհեմը» հետևում է գերմանացու հետ կապված իրավիճակին և պատրաստ է առաջարկ անել: Ռոյսի նկատմամբ հետաքրքրություն է ցուցաբերում նաև «Լիվերպուլը», որը ցանկացել է գնել հարձակվողին դեռ 2014 և 2015 թվականներին: Ընթացիկ մրցաշրջանում 28-ամյա հարձակվողն անցկացրել է 3 խաղ Բունդեսլիգայում և դարձել է 3 գոլի հեղինակ:
Պատրաստեց Անի Գաբուզյանը
