«Որևէ կապ չեմ տեսնում ԱՄՆ-ի կողմից ՌԴ նկատմամբ կիրառվող սանկցիաների և Հայաստանի միջև». Ստեփան Գրիգորյան
Ռազմական փորձագետ, «Ռազմինֆո» կայքի համակարգող Կարեն Վրթանեսյանի կարծիքով՝ ռուս-հայկական հարաբերություններն ազդում են հայ-ամերիկյան հարաբերությունների վրա, բայց այս հարցում, ըստ նրա՝ Հայաստանը փորձում է մաքսիմալ չեզոք դիրքորոշում ունենալ, և դա հասկանում են թե՛ ՌԴ-ում, թե՛ ԱՄՆ-ում։
«Ադրբեջանի և ԱՄՆ-ի միջև էլ խնդիրներ կան, հատկապես՝ կապված մարդու իրավունքների հետ, բայց բիզնեսում ԱՄՆ-ի և Ադրբեջանի հարաբերությունները քիչ թե շատ նորմալ են, և դժվար թե ԱՄՆ-ը լուրջ սանկցիաներ կիրառի Ալիևի ռեժիմի դեմ։ Ադրբեջանը կշարունակի զենքի մեծ մասը գնել ՌԴ-ից, քանի որ Ադրբեջանի գրեթե բոլոր ենթակառուցվածքները հիմնված են ռուսական զինամթերքի վրա»,- այսօր «Մեդիա կենտրոնում» կազմակերպված քննարկման ժամանակ ասաց փորձագետը։
Քննարկման մասնակից Գլոբալիզացիայի և տարածաշրջանային հետազոտությունների վերլուծական կենտրոնի նախագահ Ստեփան Գորիգորյանն ասաց, որ Թրամփի ադմինիստրացիայի արտաքին քաղաքականությունը սկսել է հստակեցվել. «Մեկ տարվա ընթացքում մենք տեսնում էինք նրա առանձին քայլերը, հիմա կարծես թե կոնցեպտը պատկերվում է։ Պատժամիջոցներ կան, և դրանք հաստատված են օրենքով, որն ընդունվեց նախորդ տարի Կոնգրեսի կողմից, և անկախ Թրամփի ցանկությունից՝ այդ մեքենան աշխատելու է։ Այդ պատժամիջոցները կապված են ոչ միայն Ուկրաինայի հետ, այլ գնում է զենքի շուկայի համար պայքար, քանի որ նրանք անհանգստացած են, որ Ռուսաստանը մտել է բոլոր այն շուկաներ, որտեղ նախկինում չի եղել։ Իհարկե, մենք պետք է հետևենք, մեզ համար ինչ-որ սպառնալիքներ կան, բայց այն գնումները, որ կատարում ենք ՌԴ-ից, այդքան էլ մեծ չեն, որ մեծ անհանգստություն առաջացնեն»։
Գրիգորյանը չի տեսնում որևէ կապ այդ սանկցիաների և Հայաստանի միջև. «Այո, մենք պետք է մտածենք, թե ինչպես դրանք կանդրադառնան մեր և ՌԴ-ի, և այլ երկրների հետ հարաբերությունների վրա։ Բայց մյուս կողմից՝ մենք ու Ռուսաստանը Կոլեկտիվ անվտանգության պայմանագիր ունենք, որն անօրինական համագործակցություն չէ, և չեմ կարծում, որ այդ մասին ԱՄՆ-ում չգիտեն, դա բաց համագործակցություն է։ Մենք համագործակցում ենք ՆԱՏՕ-ի հետ և փորձում ենք կոմպլեմենտար քաղաքականություն վարել։ Դրա համար, չեմ կարծում, թե դա սուպերակտուալ հարց է ։ Իհարկե, երբ աշխարհի խոշոր խաղացողների միջև նման բարդ հարաբերություններ են, պարզ է, որ փոքր խաղացողների համար դժվար է ընտրություն կատարել։
Բայց Թրամփի ադմինիստրացիայի քաղաքականությունը Ռուսաստանի նկատմամբ ես չէի կապի Հայաստանի հետ, եթե անգամ մենք ունենք առևտուր։ Հայաստանը ՌԴ-ից այն ծավալների զենք չի գնում, որ դա ուշադրություն գրավի։ Եթե համեմատենք մեր ծավալներն այն ծավալների հետ, որով զենք է գնում Ադրբեջանը, ապա այն մի քանի անգամ ավելի է։ Դրա համար, սանկցիաներն ի՞նչ կապ պետք է ունենան Հայաստանի հետ»։
Ստեփան Գրիգորյանը հիշեցրեց, որ, երբ Իրանը կոշտ պատժամիջոցների տակ էր, Հայաստանը պաշտոնապես համագործակցում էր նրա հետ. «Այդ թվում՝ այն նուրբ ոլորտում, որն էներգետիկան է»։
