Կոմիտասի զբոսայգում քաղաքացին դանակահարել է ոստիկանի

ՀՀ հատուկ քննչական ծառայության քննիչի վարույթին է հանձնվել ՀՀ քննչական կոմիտեում ավելի քան 6 ամիս քննված քրեական գործը, որի նյութերի ուսումնասիրությամբ պարզվել է, որ 05.06.2017թ.-ին` Երևանի Կոմիտասի անվան զբոսայգում տեղի ունեցած վիճաբանության ժամանակ, Թ. Խշոյանը սուր կտրող-ծակող գործիքով հարվածներ է հասցրել Մ. Եղիկյանին և ՀՀ ոստիկանության աշխատակից Է. Բերբերյանին` վերջիններիս պատճառելով ծանր մարմնական վնասվածքներ:

Դեպքի առթիվ 06.06.2017թ.-ին ՀՀ քննչական կոմիտեի ԵՔՔՎ Շենգավիթ վարչական շրջանի քննչական բաժնում ՀՀ քրեական օրենսգրքի 112-րդ հոդվածի 2-րդ մասի 1-ին կետով հարուցվել է քրեական գործ, որի շրջանակներում Թ. Խշոյանին մեղադրանք է առաջադրվել ՀՀ քրեական օրենսգրքի 112-րդ հոդվածի 2-րդ մասի 1-ին կետով: Նրա նկատմամբ որպես խափանման միջոց է կիրառվել կալանավորումը:

Նախաքննության ընթացքում մեղադրյալ Թ. Խշոյանը հայտնել է, որ վիճաբանության ժամանակ 5-6 անձինք իրեն ծեծի են ենթարկել և պատճառել մարմնական վնասվածքներ, որոնց վերաբերյալ որոշակի տվյալներ նախաքննության ընթացքում չի հայտնել, սակայն միջադեպից շուրջ 6 ամիս անց` 04.12.2017թ.-ին, ցուցմունք է տվել, որ իրեն ծեծի ենթարկած անձանց թվում եղել է ոստիկանության աշխատակից Է. Բերբերյանը:

Թ. Խշոյանին ծեծի ենթարկելու և առողջությանը թեթև վնաս պատճառելու դեպքերի առթիվ 07.12.2017թ.-ին ՀՀ ՔԿ ԵՔՔՎ Շենգավիթ վարչական շրջանի քննչական բաժնում ՀՀ քրեական օրենսգրքի 118-րդ և 117-րդ հոդվածներով հարուցվել է քրեական գործ, որը միացվել է նույն բաժնում ՀՀ քրեական օրենսգրքի 112-րդ հոդվածի 2-րդ մասի 1-ին կետով քննվող քրեական գործին և քննչական ենթակայության կարգով ուղարկվել ՀՀ հատուկ քննչական ծառայություն:

Նախաքննությունը շարունակվում է:

Ծանուցում. ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: