«Մինչև նոյեմբերի 20-ը հանձնաժողովը կներկայացնի իր գնահատականը Շիրակի համալսարանում տիրող վիճակի վերաբերյալ». Վարդան Բոստանջյան
Ինչպես տեղեկացրել ենք՝ Շիրակի պետական համալսարանի որոշ դասախոսներ ահազանգել են, որ համալսարանի ռեկտոր Սահակ Մինասյանն ունենալով իշխանությունների հովանավորչությունը, ռեպրեսիվ մեթոդներ կիրառելով՝ կադրային ջարդ է իրականացնում Շիրակի պետական համալսարանում՝ ցանկանալով ազատվել որակյալ կադրերից:
Այսօր համալսարանի դասախոս Գագիկ Համբարյանը կոչով դիմել է նաև ՀՀ Ազգային ժողովի Գիտության, կրթության, մշակույթի, երիտասարդության և սպորտի հարցերի մշտական հանձնաժողովի նախագահ Վարդան Բոստանջյանին՝ հորդորելով արձագանքել ստեղծված իրավիճակին:
168.am-ի հետ զրույցում Վ. Բոստանջյանն ասաց, որ հանձնաժողովը, իհարկե, պարտավոր է ոչ միայն արձագանքել, այլև նայել, ուսումնասիրել ու գնահատական տալ:
Նա նկատեց, որ կրթության և գիտության նախարար Լևոն Մկրտչյանն ասել է, որ իրենք քննություն են անցկացնում, որպեսզի պարզեն և գնահատեն ամբողջ իրավիճակը. «Ես նախարարի հետ էլ եմ խոսել դրա մասին: Սա այնպիսի նուրբ խնդիր է, որն առնչվում է և՛ ուսանողներին, և՛ դասախոսներին, դրա համար մենք միանգամից կտրուկ ձևով չենք կարող պատասխան տալ: Գոնե հանձնաժողովը և նախարարությունը նման իրավունք չունեն, մինչև իրերի իրական վիճակը չպարզվի»:
Վ. Բոստանջյանն ասաց, որ իրենց հանձնաժողովի տարբեր անդամներին հանձնարարված է, որ ուսումնասիրություններ անեն և եզրակացություն կայացնեն. «Այս պահին մեր հանձնաժողովի կողմից ուսումնասիրություններ են տարվում այդ ուղղությամբ, չէին կարող չտարվել»:
Նա նաև նշեց, որ կարծում է՝ իրենք մինչև ամսի 20-ն այդ եզրակացությունը և գնահատականը կներկայացնեն:
