«Մեր նպատակն է՝ Արցախը դարձնել մեղրի երկիր». Արցախի մեղվապահների ասոցիացիայի նախագահ
«Մենք բոլորս աշխատում ենք, որ մեղրը դառնա Արցախի ազգային արտադրանքը»,- 168.am-ի հետ զրույցում ասաց Արցախի մեղվապահների ասոցիացիայի նախագահ Սուրեն Գրիգորյանը՝ «Arm Prod Expo» միջազգային մասնագիտացված ցուցահանդեսի ժամանակ:
Նա նշեց, որ իրենք արդեն մեկ տարի է, որ Եվրոպայից նոր տեխնոլոգիաներ են բերել Արցախ և զբաղվում են արդյունաբերական մեղվապահությամբ. «Աշխատում ենք մեզ ապահովել ժամանակակից սարքավորումներով և համապատասխան գործիքներով, որոնք համապատասխանում են միջազգային ստանդարտներին: Մեր նպատակն է՝ Արցախը դարձնել մեղրի երկիր: Մենք բոլորս աշխատում ենք, որ մեղրը դառնա Արցախի ազգային արտադրանքը»:
Ըստ Ս. Գրիգորյանի՝ իրենց բնակլիմայական պայմանները և մնացած բոլոր նախադրյալները համապատասխան են, որ իրենք կարողանան մաքուր մեղր արտադրել:
Հարցին՝ ձեր արտադրանքը դեռևս միայն Արցախո՞ւմ է վաճառվում, Ս. Գրիգորյանն այսպես պատասխանեց. «Պարզ է, որ մենք ամեն ինչ անում ենք, որ այդ մաքուր մեղրը կարողանանք տանել նաև արտասահման, դա շատ կարևոր հարց է մեզ համար: Առաջին խնդիրն այն է, որ ստեղծենք իդեալական պայմաններ՝ մաքուր մեղր ստանալու համար: Մենք բոլոր շանսերն ունենք, որ այդ արտադրանքը տանենք Եվրոպա, բայց դրա համար, իհարկե, ժամանակ է պետք»:
Նա նաև նշեց, որ իրենք այս մեկ տարվա գործունեության արդյունքում արտադրանքից գոհ են և հույս ունեն մի քանի անգամ ավելացնել արտադրանքի ծավալները:
Մանրամասները՝ 168.am-ի տեսանյութում:
