Սուր շնչառական հիվանդությունների դեպքերի աճ է գրանցվել Հայաստանում
Սուր շնչառական հիվանդությունների դեպքերի աճ է գրանցվել Հայաստանում: Հիվանդությանը նպաստող առաջին կարևոր գործոններից է ջերմաստիճանի կտրուկ նվազումը: Այսօր լրագրողների հետ զրույցում ՀՀ ԱՆ գլխավոր ինֆեկցիոնիստ Արա Ասոյանն ասաց, որ բարդացման դեպքերը բավականին քիչ են:
«Սուր շնչառական հիվանդությունների բավական մեծ քանակով դեպքեր են գրանցվել: Սակայն այս շնչառական հիվանդությունը գրիպ չէ: Գրիպին բնորոշ է շատ ավելի ծանր ընթացք»,- ասաց Արա Ասոյանն ու հավելեց, որ սուր շնչառական հիվանդությունների նման սրացում ամեն տարի այս եղանակին լինում է:
Ինֆեկցիոնիստի խոսքով՝ սուր շնչառական վարակներն ավելի շատ հանդիպում են երեխաների դեպքում: Հիվանդությունը տարածվում է դպրոցներում և մանկապարտեզներում, որտեղ երեխաների շփումը շատ է: Հիվանդությունն արտահայտվում է ջերմությամբ, հազով, քթահոսությամբ, երբեմն նաև անգինայով: Ապաքինման համար անհրաժեշտ է 3-4 օր:
Նա հիվանդացության դեպքերի հստակ թիվ նշել չկարողացավ: «Գրանցված թվերը չեն արտահայտում հիվանդության իրական պատկերը: Նորքի Ինֆեկցիոն կլինիկական հիվանդանոց օրական դիմում են սուր շնչառական հիվանդությունով 8-10 երեխա: Սակայն շատերը չեն դիմում պոլիկլինիկա: Իսկ վարակիչ հիվանդությունների հաշվառումը շատ կարևոր է Առողջապահության նախարարության համար՝ հետագա անելիքները պլանավորելու տեսանկյունից»,-ասաց Ասոյանն ու հորդորեց հիվանդության առաջին նշաններն ի հայտ գալու դեպքում անմիջապես դիմել տեղամասային պոլիկլինիկա:
Նախորդ տարվա նույն ժամանակի համեմատ հիվանդացության աճ գրեթե չկա: Իրավիճակը վերահսկելի է: Դպրոցներում հոկտեմբերի երկրորդ կեսից սկսվելու են աշնանային արձակուրդները, ինչը ևս կնպաստի վարակի հնարավորինս քիչ տարածմանը:
Թեև սուր շնչառական վարակներն օդակաթիլային ճանապարհով տարածվող հիվանդություններ են, և դրանցից խուսափելը դժվար է, այնուամենայնիվ, Ասոյանը խորհուրդ տվեց որոշակի քայլեր ձեռնարկել վարակի տարածումը կանխելու նպատակով. հիվանդ երեխային չուղարկել դպրոց կամ մանկապարտեզ, հաճախ օդափոխել սենյակները, օգտագործել կիտրոն:
