Ֆուտբոլի Հայաստանի ազգային ընտրանին Բուխարեստում է
Հայաստանի ֆուտբոլի ազգային թիմն արդեն Ռումինիայում է: Այս մասին հայտնում է ՀՖՖ-ն: Երևանի ժամանակով 11:30-ին, Հայաստանի ազգային հավաքականը և ՀՖՖ ֆուտբոլային պատվիրակությունը ժամանեցին Ռումինիայի մայրաքաղաք Բուխարեստ: Թիմը հանգրվանել է Բուխարեստի «Ինտերկոնտինենտալ» հյուրանոցում:
Օգոստոսի 31-ին՝ տեղական ժամանակով 19:30-ին (Երևանի ժամանակով՝ 20:30)՝ «Արենա Նացիոնալա» մարզադաշտի մամուլի ասուլիսների սրահում, կկայանա Հայաստանի ազգային հավաքականի գլխավոր մարզիչ Արթուր Պետրոսյանի նախախաղային մամուլի ասուլիսը:
Նույն օրը՝ ժամը 20:00-ին (Երևանի ժամանակով՝ 21:00-ին)՝ «Արենա Նացիոնալա» մարզադաշտում կկայանա Հայաստանի ազգային հավաքականի նախախաղային մարզումը, որի առաջին 15 րոպեները բաց կլինեն մեդիայի հավատարմագրված ներկայացուցիչների համար:
Սեպտեմբերի 1-ին՝ Երևանի ժամանակով 22:45-ին՝ Ռումինիայի մայրաքաղաք Բուխարեստի «Արենա Նացիոնալա» մարզադաշտում, կկայանա Աշխարհի 2018 թ. առաջնության ընտրական փուլի Ռումինիա-Հայաստան հանդիպումը: Անմիջապես հանդիպումից հետո Հայաստանի ազգային հավաքականը և ՀՖՖ ֆուտբոլային պատվիրակությունը կվերադառնան Հայաստան:
