Մեկ հաղթանակ, և Հայաստանի հավաքականը դուրս կգա հաջորդ փուլ
ԱԱ2019-ի նախընտրական փուլի 5-րդ տուրում Հայաստանի հավաքականը հյուրընկալվելիս 70։93 հաշվով զիջեց Շվեդիայի հավաքականին և նահանջեց 3-րդ հորիզոնական։
Բոսնիա և Հերցեգովինայի ընտրանին այս տուրում հյուրընկալվելիս 92։74 հաշվով հաղթեց Սլովակիային։
Հայաստանի հավաքականի գլխավոր մարզիչ Նիկշա Բավցևիչը Շվեդիայի հետ արտագնա խաղից հետո խոսել է խաղի մասին։
«Մրցակիցը մեծ ճնշում գործադրեց մեզ վրա և բավական կոպիտ էր գործում։ Շվեդիան կանոնների 31 խախտում է թույլ տվել այս խաղում։ Նրանք շատ ուժեղ հսկողություն էին սահմանել Բոաթրայթի նկատմամբ։ Ցավոք, մենք չդիմացանք այդ ճնշմանը։ Ունեցել ենք գնդակի 19 կորուստ: Բավական անհաջող ենք իրացրել նաև տուգանայինները։ Այս երկու հանգամանքը մեծ ազդեցություն ունեցավ խաղի ելքի վրա։ Մեր թիմը դեռ նման հանդիպումների փորձ չունի, ինչը տեսանելի էր այսօրվա խաղում։
Շվեդիան հաղթեց և ապահովեց իր տեղը հաջորդ փուլում։ Ամեն ինչ դեռ մեր ձեռքերում է, քանի որ վերջին տուրում մենք կարող ենք հաղթել Բոսնիային և նվաճել այս խմբի 2-րդ ուղեգիրը։ Այլ տարբերակ չունենք՝ պետք է հաղթենք Բոսնիային։ Հույս ունեմ, որ հայ երկրպագուները կգան մարզադահլիճ և կաջակցեն մեզ»։
Հայաստան-Բոսնիա և Հերցեգովինա հանդիպումը կկայանա օգոստոսի 19-ին և կսկսվի 20։00-ին։ Մուտքն ազատ է։
Սիրարփի Աղաբաբյան
