«Այս նախաձեռնության շնորհիվ Հայաստանը դառնալու է մարդասիրական ամենախոշոր կենտրոններից մեկը». վարչապետը՝ «Ավրորա»-ի մասին
ՀՀ վարչապետ Կարեն Կարապետյանը ֆեսբուքյան իր էջում անդրադարձել է «Ավրորա» մրցանակաբաշխությանը: Խոսելով «Ավրորա 2017» -ի մասին՝ վարչապետն ասել է.
«Այսօր տեղի կունենա տարվա կարևորագույն իրադարձություններից մեկը՝ 2017թ.-ի «Ավրորա»-ի մրցանակաբաշխությունը։
Պատահական չէ, որ այս տարի մրցանակի շնորհման արարողությունը տեղի է ունենում մայիսի 28-ին՝ Հայաստանի Առաջին Հանրապետության օրը: Դա խորհրդանշում է մեր ժողովրդի անցած ճանապարհը՝ այն, որ ցեղասպանության ենթարկված ժողովուրդն ընդամենը մի քանի տարի անց իր մեջ ուժ ու կամք գտավ ստեղծելու իր անկախ պետությունը: Եվ այսօր՝ 100 տարի անց, ցեղասպանություն վերապրածների անունից փրկիչներին երախտագիտություն հայտնելը ու ուրիշներին օգնելն իսկապես չափազանց ոգևորիչ է և ապացուցում է, որ մենք հաղթած ու հաջողության հասած ազգ ենք:
Վստահ եմ, որ այս նախաձեռնության ու այն իրականություն դարձնող մարդկանց շնորհիվ Հայաստանը դառնալու է մարդասիրական ամենախոշոր կենտրոններից մեկը»:
