«ԱրմենՏելն»` օրենքի ծուղակում. Ընկերությունը կտուգանվի 1 մլն դրամով
«ԱրմենՏել» ընկերությունն այս տարի ապրիլին մասնակցել և հաղթել է «Հայաստանի ազգային պոլիտեխնիկական համալսարան» հիմնադրամի կարիքների համար ամրակցված հեռախոսակապի ծառայությունների գնման մրցույթին: Ընկերությունն առաջարկել է Հանձնաժողովի սահմանած առավելագույն սակագներից ցածր սակագներ և այդ մասին տեղեկացրել ՀԾԿՀ-ին:
Սակայն, ՀԾԿՀ որոշմամբ` «ԱրմենՏելն» իրավունք չունի հանձնաժողովի սահմանած առավելագույն սակագներից ցածր սակագներ առաջարկել սպառողներին, բացի «Գնումների մասին» օրենքով նախատեսված որոշ դեպքերից: Իսկ Հայաստանի ազգային պոլիտեխնիկական համալսարանն այդ «որոշ դեպքերի» մեջ չի մտնում:
Ստացվում է, որ ընկերությունը ՀԾԿՀ սահմանած կարգն է խախտում և բաժանորդների նկատմամբ գնային խտրականություն է դրսևորում:
Ու թեև ՀԾԿՀ իրականացրած վարույթի ժամանակ «ԱրմենՏելը» ներկայացրել է իր պարզաբանումները և անհամաձայնությունը, հանձնաժողովը որոշել է ընկերությանը տուգանել 1 միլիոն դրամ գումարի չափով:
