«Ստատուս-քվոն այլևս հնարավոր չէ պահպանել». Պյոտր Սվիտալսկին՝ Արցախի հարցի մասին
ՀՀ-ում ԵՄ պատվիրակության ղեկավար, դեսպան Պյոտր Սվիտալսկին այսօր լրագրողների հետ զրույցում անդրադարձավ Արցախի հարցին և ԵԱՀԿ ՄԽ համանախագահների վերջին՝ Ադրբեջանին ուղղված հասցեական հայտարարությանը։
Դեսպանը նշեց, որ Արցախում և դրա շուրջ ծավալվող իրադարձություններն ու իրավիճակը մանրամասն քննարկվել է համագործակցության խորհրդի ժամանակ՝ ՀՀ ԱԳ նախարար Էդվարդ Նալբանդյանի և Ֆեդերիկա Մոգերինիի միջև.
«ԵՄ հիմնարար սկզբունքները բարձրաձայնվել են այդ հանդիպման ժամանակ, և կարող եմ ասել, որ հայկական կողմը խիստ բավարարված է Ֆեդերիկա Մոգերինիի կողմից բարձրաձայնված դրույթների մասով»:
Դեսպանը նշեց, որ ԵՄ-ն մեծապես սատարում է ՄԽ համանախագահների գործողությունները.
«Մենք լիարժեքորեն սատարում ենք նաև համանախագահների վերջին հայտարարությունը։ Մենք հավատում ենք, որ ստատուս-քվոն այլևս հնարավոր չէ պահպանել, մենք հավատում ենք, որ հրադադարի համաձայնագիրը պետք է հարգվի, մենք հավատում ենք, որ չկա այս հակամարտության ռազմական լուծում, և մենք հավատում ենք, որ հետաքննության մեխանիզմները, նաև՝ վստահության ձևավորման մեխանիզմները պետք է իրականացնել»։
Պ. Սվիտալսկին նաև հավելեց, որ ԵՄ-ն պատրաստ է վերականգնման համար աջակցություն տրամադրել՝ արցախյան հակամարտության կարգավորումից հետո.
«Երբ այս հակամարտությունը լուծվի և խաղաղություն լինի Արցախում, ապա ԵՄ-ն պատրաստ կլինի զգալի գումարներով աջակցել նաև այդ տարածքի բնակիչներին»։
Մանրամասները՝ 168.am-ի տեսանյութում
