Գերմանիայի արտգործնախարարը բարդ է համարում Թուրքիայի հետ հետագա երկխոսությունը
Գերմանիայի արտաքին գործերի նախարար Զիգմար Գաբրիելն անդրադարձել է գերմանացի պատգամավորների կողմից Թուրքիա կատարելիք այցը վերջին պահին չեղարկելուն՝ Թուրքիային մեղադրելով պատգամավորների նկատմամբ «մուտքի արգելք» կիրառելու մեջ: Այս մասին հայտնում է գերմանական Deutsche Welle-ն:
Չինաստան կատարած այցի ժամանակ արտգործնախարարը կատարվածը «լուրջ զարգացում» է անվանել՝ նշելով, որ դրանից հետո երկխոսությունը հեշտ չի լինելու:
Գերմանիայի դաշնային խորհրդարանի նախագահի տեղակալ, Կանաչների կուսակցության պատգամավոր Կլաուդիա Ռոթի ղեկավարությամբ պատգամավորների պատվիրակության այցը Թուրքիա վերջին պահին չեղյալ էր համարվել: Ռոթի գլխավորած պատվիրակության այցը պետք է տեղի ունենար մայիսի 25-28-ը: Թուրքիայում նրանք մտադիր էին հանդիպել իշխող ու ընդդիմադիր կուսակցությունների, քաղաքական գործիչների, ինչպես նաև հասարակական կազմակերպությունների ու լրատվամիջոցների ներկայացուցիչների հետ:
«Տեղեկացանք, որ թուրքական կառավարությունը հարմար չի համարում բարձր մակարդակի քաղաքական հանդիպումներ իրականացնել գերմանացի պատգամավորների հետ: Սա փաստացի հրաժարում է քաղաքական երկխոսությունից: Սա գերմանական կառավարությանը ցույց տրված կարմիր քարտ է»,-ասել էր Ռոթը՝ ընդգծելով, որ դա, փաստորեն, քաղաքական երկխոսության մերժում է նշանակում:
