Թվիթերում կատարած գրառումների համար քուրդ արվեստագետի նկատմամբ մեղադրանք է առաջադրվել
Թուրքիայում քուրդ հայտնի արվեստագետ Ֆերհաթ Թունչը թվիթերում կատարած գրառումների պատճառով կկանգնի դատարանի առաջ։
Թունչը , ով Թվիթերի իր միկրոբլոգում Թուրքիայի ընդդիմադիր «Ժողովուրդների դեմոկրատական կուսակցության» (ԺԴԿ-HDP) վերաբերյալ գրառումներ է կատարել, մեղադրվում է «ահաբեկչական կազմակերպության օգտին քարոզչություն անելու» մեջ։
Ըստ «Demokrathaber» լրատվական կայքի՝ ավելի վաղ Թունչը բերման էր ենթարկվել «նախագահին վիրավորելու» մեղադրանքով։
Ինքը Թունչը թեմայի վերաբերյալ ասել է. «ԺԴԿ-ի համանախագահ Սելահաթթին Դեմիրթաշի և կուսակցություն մյուս ձերբակալված պատգամավորների վերաբերյալ գրառումներս որպես ապացույց ներառվել են մեղադրական եզրակացությունում։ Ստացվում է՝ ամեն տեսակի քննադատությունը ընկալվում է, որպես «ահաբեկչական կազմակերպության օգտին քարոզչություն»։ Նրանց նպատակը մեզ 4 պատի մեջ փակելն է»։
