Թուրքիայի բարձրագույն ընտրական հանձնաժողովը մերժել է հանրաքվեի արդյունքները չեղարկելու քեմալականների դիմումը
Թուրքիայի բարձրագույն ընտրական հանձնաժողովը մերժել է Հանրապետական ժողովրդական կուսակցության (CHP) կողմից ներկայացված ապրիլի 16ի հանրաքվեի արդյունքները չեղարկելու վերաբերյալ դիմումը: Այս մասին հայտնում է թուրքական «Հաբերլեր»-ը:
Մերժմանն ի պատասխան` CHP-ն հայտարարել է, որ հանրաքվեի արդյունքները չեղարկելու հայցով պատրաստվում է դիմել Թուրքիայի վճռաբեկ, ապա նաև Մարդու իրավունքների եվրոպական դատարան:
Բարձրագույն ընտրական հանձնաժողովը մերժել է նաև Թուրքիայի «Հայրենիք» և քրդամետ Ժողովուրդների դեմոկրատական կուսակցությունների հանրաքվեի արդյունքների չեղարկման վերաբերյալ դիմումները:
Թուրքիայում ապրիլի 16-ին տեղի ունեցած սահմանադրական հանրաքվեի արդյունքներով հաղթել է «այո» ն. սահմանադրական փոփոխություններին «այո» է ասել ընտրողների 51,41 տոկոսը, «ոչ»` 48,59 տոկոսը: Սահմանադրական փոփոխությունները նախատեսում են անցում կառավարման նախագահական համակարգի և նախագահի լիազորությունների նշանակալի ընդլայնում:
