Ուկրաինան պահանջում է Ռուսաստանից անհապաղ դադարեցնել Դոնբասում ընթացող ռազմական գործողությունները
Ուկրաինայի ԱԳՆ-ն խորը անհանգստություն է հայտնում՝ կապված Դոնբասում ռուսական ուժերի ակտիվացման հետ, հայտնում է «Գրուզիա օնլայնը»։
Ինչպես ասվում է Ուկրաինայի ԱԳՆ-ի՝ Դոնբասում իրավիճակի առնչությամբ արված հայտարարության մեջ, վերջին 2 օրերին ռուսական «օկուպացիոն զորքերը» իրենց տրամադրության տակ գտնվող բոլոր զինատեսակներից լայնամասշտաբ հրաձգություն են սկսել շփման գծի ողջ երկայնքով։
Սպանվել է 8 ուկրաինացի զինծառայող, 26-ը վիրավորվել է։
Ռազմական գործողությունների հետևանքով վիրավորվել է 2 խաղաղ բնակիչ, Յասինովատայա և Ավդեևկա քաղաքները ամբողջությամբ հոսանքազրկվել են, դադարեցվել է ջրամատակարարումը, ինչի հետևանքով տուժել է շրջանի մոտ 400 հազար բնակիչ։
Եղանակային պայմանների հետևանքով մարդասիրական իրավիճակն այդ շրջանում շարունակում է վատթարանալ։
Ուկրաինայի ԱԳՆ-ն պահանջել է Ռուսաստանից անհապաղ դադարեցնել ռազմական գործողությունները ու հետևել հրադադարի ռեժիմին։
