«Չափից դուրս կրթվածությունը հղի է հեղափոխություններով». Ժիրինովսկի
Ռուսաստանի լիբերալ-դեմոկրատական կուսակցության առաջնորդ Վլադիմիր Ժիրինովսկին, այսօր ելույթ ունենալով Պետդումայում, ռուսներին զգուշացրել է բնակչության շրջանում աճող կրթվածության վտանգների մասին։ Նրա ելույթի տեսագրությունը հրապարակվել է Ժիրինովսկու Twitter-յան էջում։
Ժիրինովսկին ընդունել է, որ «կրթությունը շատ կարևոր է», սակայն հայտարարել է, որ որքան կրթված է ժողովուրդը, այնքան արագ կիրականացվեն հեղափոխություններ»։
«Աճող սերունդը ավելի կիրթ է, քան մենք»,- հայտարարել է նա՝ նշելով, թե «բոլոր նարնջագույն հեղափոխությունները իրականացրել է երիտասարդությունը։
Բացի այդ՝ լավ կրթություն ստացած անձինք չեն ցանկանա կատարել սև աշխատանք, իշխանությունները պետք է ավելի շատ ներգաղթյալների հրավիրեն, ու կավելանա հանցավորությունը։
Կրթված մարդիկ, իրենց հերթին, կսկսեն կառավարությունից ավելի մեծ ազատություն պահանջել։
