Թրամփը գրանցել է 2020թ. ԱՄՆ նախագահական ընտրությունների իր կարգախոսը
ԱՄՆ նախագահ Դոնալդ Թրամփն արդեն գրանցել է 2020թ. նախագահական ընտրարշավի իր կարգախոսը։ Ինչպես հայտնում են ամերիկյան լրատվամիջոցները, Թրամփը որոշել է նախագահական երկրորդ ժամկետում վերընտրվել «Պահպանե՛նք Ամերիկան մեծ» կարգախոսով։
Իրավաբանները կարգախոսի գրանցման հայտը ներկայացրել էին դեռևս հունվարի 18-ին՝ Թրամփի երդմնակալության արարողությունից 2 օր առաջ։
Հայտի տեքստում ասվում է, որ այդ կարգախոսը «կարող է օգտագործվել մարզաշապիկների, շապիկների, մանկական հագուստի, տպագիր արտադրանքի վրա, մասնավորապես՝ բրոշյուրներում, որտեղ կներկայացվի Թրամփի մասին տեղեկություն՝ որպես թեկնածու»։
«Պահպանե՛նք Ամերիկան մեծ» կարգախոսը գալիս է փոխարինելու «Դարձնենք Ամերիկան մեծ» կարգախոսին, որը Դոնալդ Թրամփը հաջողությամբ կիրառեց 2015-2016թթ. իր նախընտրական քարոզարշավի ժամանակ։
Թրամփը պատենտավորել էր կարգախոսը 2012թ. ԱՄՆ նախագահական ընտրություններում Միթ Ռոմնիի պարտությունից մի քանի օր անց։
