««Գազպրոմը» սկսել է հայցեր նախապատրաստել ռուսական գազի թուրք ներկրողների դեմ». «Կոմերսանտ»
«Գազպրոմը» պատրաստվում է հայցեր ներկայացնել մասնավոր ընկերությունների՝ Թուրքիա ռուսական գազի ներկրողների դեմ, որոնց հետ չի կարողացել պայմանավորվածություն ձեռք բերել 2017թ. գազի գնի վերաբերյալ, գրում է «Կոմերսանտը»՝ վկայակոչելով երկու երկրներում իր աղբյուրներին։
Ինչպես նշվում է, ռուսական ընկերությունը հայցեր է ներկայացնելու արբիտրաժային դատարան մասնավոր թուրք գազային ներկրողների դեմ, որոնց հետ չի կարողացել պայմանավորվածություն ձեռք բերել 2017թ. գազի գնի վերաբերյալ։
Պարբերականի աղբյուրների տվյալով՝ «Գազպրոմ-էքսպորտն» արդեն նախապատրաստել է փաստաթղթերը։ Հայցերը կներկայացվեն, ամենայն հավանականությամբ, Ստոկհոլմի արբիտրաժային դատարան։
Աղբյուրներից մեկի խոսքով՝ «Գազպրոմը» մասնավոր ներկրողներին առաջարկել է նրանց համար սահմանել այս տարվա համար ժամանակավոր գին (բարձր, քան 2016թ.), որը կգործեր մինչ թուրքական պետական Botas ընկերության հետ հետաքննության ավարտը, որը կարող է գազ մատակարարել Թուրքիայի ներքին շուկային։
«Կոմերսանտը» գրում է, որ «Գազպրոմի» գործողությունները ցուցադրում են Ռուսաստանի և Թուրքիայի գազային հարաբերություններում զգալի փոփոխությունը, հատկապես հաշվի առնելով երկու երկրների հարաբերությունների ընդհանուր ջերմացումը։
