«Հայաստանի ազգային կինոկենտրոնը կլուծարվի». Արմեն Ամիրյան
Այսօր Ժողովրդական արվեստի թանգարանում տեղի ունեցավ Մշակույթի նախարար Արմեն Ամիրյանի տարեվերջյան ամփոփիչ մամուլի ասուլիսը, միաժամանակ նախարարը ներկայացրեց 2017 թվականի անելիքները:
Անդրադառնալով կինոոլորտի խնդիրներին, նախարարը հայտարարեց՝ կլինեն փոփոխություններ, որոնք առավելապես կառավարման մոդելի այլընտրանքային մոտեցումներ կկրեն: Կստեղծվի կինոարտադրող ընկերությունների տնօրենների խորհուրդ, որի ղեկավարմամբ, ինչպես նաև ֆինանսատնտեսական հարցերի տնօրինությամբ կզբաղվի համապատասխան ընտրված մասնագետը: «Կինոարտադրող ընկերությունների տնօրենները ռոտացիոն սկզբունքով կլինեն ղեկավարներ, որոնք կհամակարգեն նաև ամբողջ ոլորտը: Մենք ուզում ենք ներգրավել արտասահմանյան կինոարտադրողներին նույնպես, ովքեր արտոնյալ կարգավիճակ կունենան` ազատվելով 20 տոկոս հարկից»,- նշեց Արմեն Ամիրյանը:
Հայաստանի ազգային կինոկենտրոնը կլուծարվի, կվերակազմավորվի և կանվանափոխվի, որի բազայի վրա ռոտացիոն կարգով կհամակարգի կինոարտադրությունը. «Այսօր կա Կինոկենտրոն, վաղը չի լինելու այն: Հայաստանի ազգային կինոկենտրոնը կլուծարվի, իսկ թե ի՞նչ խախտումներ են եղել այնտեղ, պարզ կլինի միայն աուդիտից հետո: Կինոկենտրոնը, ճիշտ է, կարևորագույն դեր է ունեցել կինոյի զարգացման ոլորտում, սակայն ժամանակները փոխվել են, և ամեն լավ բան պետք է դիտարկել կոնկրետ ժամանակի մեջ: Այժմ պետք է կառավարման նոր ձևեր գտնենք: Մենք շարունակելու ենք գումար տրամադրել կինոարտադրությանը, պետք է ունենանք ֆիլմեր, որոնք կմասնակցեն միջազգային կինոփառատոների»:
Անդրադառնալով «Հայֆիլմի» ճակատագրին, նախարարը նկատում է.«Հայֆիլմ» կինոստուդիան մասնավորեցման գործընթացում է, իսկ այս պահին կինոստուդիայի վերապրեցման համար մենք ներդրումային ծրագիր են մշակում»:
Ամփոփելով կինոլորտի բնագավառը՝ Արմեն Ամիրյանը լրագրողներին տեղեկացրեց նաև, Մշակույթի նախարարությունն ու Հ1-ն արդեն համապատասխան պայմանավորվածություն ոնեն, որով կինոռեժիսոր Մհեր Մկրտչյանը տարեսկզբից կմեկնարկի բազմասերիանոց նոր ֆիլմի նկարահանումները, որը, ըստ նախարարի` դառնալու է բոլորի կողմից սիրված նախագիծ:
