ԱՊՊԱ գործակալներին արգելվել է հաճախորդներին զեղչեր տրամադրել. «Հրապարակ»
«Հրապարակ» թերթը գրում է. «Սկսվել է ավտոմեքենաների պարտադիր ապահովագրության շրջանը։ Գրեթե բոլոր վարորդները, որոնց մեքենաների ապահովագրության ժամկետն ավարտվել է կամ մոտ է ավարտին, այս օրերին զանգեր են ստանում տարբեր ԱՊՊԱ գործակալներից, որոնք առաջարկում են զեղչերով, գայթակղիչ պայմաններով հենց իրենց մոտ ապահովագրել ավտոմեքենան։ Բանն այն է, որ յուրաքանչյուր գործարքից ԱՊՊԱ գործակալները բոնուսներ են ստանում, և նրանց վարձատրությունը կախված է կատարած գործարքների քանակից։
Սակայն մրցակցությունն այնքան թեժ է այս ոլորտում, որ ոմանք չարաշահում են զեղչերի համակարգը, երբեմն անգամ իրենց բոնուսների հաշվին հաճախորդներ փախցնում իրարից, էլ չենք խոսում ավտոմեքենա ունեցողների կոնտակտային համարները ձեռք բերելու մասին, ինչն առնվազն անձնական տվյալների գաղտնիության խախտում է։
Զեղչեր տրամադրելու, կլիենտ փախցնելու այդ մոլուցքն սկսել է ազդել ապահովագրական գործակալությունների եկամտի վրա, նրանք սկսել են մինուսով աշխատել, վարկեր վերցնել։ Մեր տեղեկություններով՝ այսօրվանից ԱՊՊԱ գործակալներին պարտավորագրեր են տալիս ստորագրելու, ըստ որի՝ այլևս ոչ մեկին պայմանագիր կնքելիս զեղչեր չեն տրամադրելու։ Սա վերաբերում է բոլոր ապահովագրական գործակալություններին։ Գործակալություններում զգուշացրել են գործակալներին, որ նման դեպքեր նկատելու դեպքում կզրկվեն աշխատանքից»:
Ամբողջությամբ կարող եք կարդալ «Հրապարակ» թերթի այսօրվա համարում:
