Մերկելը դեմ է հանդես եկել ԵՄ-ին Թուրքիայի անդամակցության բանակցություններն սկսելուն. ԶԼՄ-ներ
Գերմանիայի կանցլեր Անգելա Մերկելը դեմ է հանդես եկել Թուրքիայի՝ Եվրամիությանն անդամակցության վերաբերյալ նոր բանակցություններ սկսելուն։ Այս մասին նա հայտարարել է իր «Քրիստոնեա-դեմոկրատական միություն» կուսակցության անդամների առաջ ելույթի ժամանակ, հայտնում է Reuters գործակալությունը՝ վկայակոչելով Bild թերթին։
Ինչպես հայտնում է պարբերականը, հղում կատարելով իր աղբյուրներին, որոնք ներկա են եղել կուսակցական հավաքին, դա նշանակում է, որ քննարկումները փաստացի ավարտվել են։
Բացի այդ, ըստ տաբլոիդի, Մերկելը հանձնարարել է այդ տեղեկությունը հասցնել ընտրողներին, որոնք ավելի վաղ հետաքրքրվել էին կուսակցության դիրքորոշմամբ՝ ԵՄ-ին Թուրքիայի անդամակցության վերաբերյալ։
Եվրախորհրդարանը Ստրասբուրգում նոյեմբերի 24-ին հավանության էր արժանացրել բանաձևը, որը կոչ է անում կասեցնել դաշինքին Թուրքիայի անդամակցության բանակցությունները, ինչը սուր քննադատություն էր առաջացրել Անկարայում։
