Ցանցահենները հարձակումներ են իրականացրել Հայաստանի և ԱՊՀ երկրների բանկոմատների վրա
Միջազգային հանցավոր խումբը մի շարք կիբերհարձակումներ է իրականացրել ավելի քան 10 երկրների, այդ թվում՝ Հայաստանի, ԱՊՀ անդամ պետությունների և Եվրամիության երկրների բանկոմատների վրա, հայտնում է Reuters-ը՝ վկայակոչելով Group-IB կիբերհանցագործությունների և խաբեության կանխման ու հետաքննության միջազգային ընկերությանը։
Դրա տեղեկություններով՝ հարձակումների են ենթարկվել Հայաստանի, Ռուսաստանի, Բելառուսի, Ղրղըզստանի, Վրաստանի, Մոլդովայի, Ռումինիայի, Մեծ Բրիտանիայի, Նիդեռլանդների և Իսպանիայի բանկերը:
Տեղեկություններ չեն հաղորդվում տուժած բանկերի և կորուստների մասին։
Հաղորդվում է, որ հատուկ ծրագրային ապահովման միջոցով հանցագործները ստիպում են բանկոմատներին կանխիկ գումար տրամադրել:
Նշվում է, որ նախկինում նմանատիպ հարձակումներ իրականացվել են, սակայն մասշտաբներն անհամեմատ փոքր են եղել։
