Կիպրոսի վերամիավորման վերաբերյալ բանակցությունները մտել են փակուղի. ՄԱԿ
Կիպրական խնդրի կարգավորման շրջանակում տարածքային հարցերի վերաբերյալ բանակցությունները, որոնք վերսկսվել էին Շվեյցարիայում, անարդյունք են ավարտվել, հայտնում է Reuters-ը՝ հղում կատարելով ՄԱԿ-ի հայտարարությանը, որը հրապարակվել է այսօր։
Կիպրոսի Հանրապետության նախագահ Նիկոս Անաստասիադիսի ու չճանաչված Հյուսիսային Կիպրոսի Թուրքական Հանրապետության ղեկավար Մուստաֆա Աքընջիի հանդիպումը մեկնարկել էր կիրակի օրը Շվեյցարիայի Մոն-Պելերին քաղաքում։
«Չնայած բոլոր ջանքերին, նրանք չեն կարողացել համաձայնության գալ տարածքային կարգավորման հարցի շուրջ, որը ուղի կհարթեր բանակցությունների վերջնական փուլի համար։ Երկու կողմերն էլ որոշել են վերադառնալ Կիպրոս և մտածել հետագա գործողությունների մասին»,- ասվում է հայտարարության մեջ։
Տարածքային հարցը կիպրական կարգավորման միջհամայնքային բանակցությունների ամենաբարդ կետերից էր։ Բանակցությունների նախորդ փուլի ընթացքում կողմերը չէին կարողացել համաձայնեցնել տարածքային խնդրի լուծման չափորոշիչները, թեև հայտարարել էին «բանակցություններում առաջընթացի մասին»։
