Էլմար Մամեդյարովն ընդունել է Ֆրանսիայի արտգործնախարարի առաջարկը
Ադրբեջանի և Ֆրանսիայի արտգործնախարարներ Էլմար Մամեդյարովը և Ժան-Մարկ Էյրոն քննարկել են Լեռնային Ղարաբաղի հակամարտության կարգավորմանն ուղղված հարցեր, հայտնում է ադրբեջանական contact.az կայքը։
Ինչպես հայտնել է Ադրբեջանի ԱԳՆ մամուլի ծառայությունը, նախարարները կարևորել են Լեռնային Ղարաբաղի հակամարտության քաղաքական կարգավորմանն ուղղված բանակցությունները։
Մամեդյարովն ընդունել է Ֆրանսիայի առաջարկը, այն է՝ «3+2» ձևաչափով հանդիպում անցկացնել արտգործնախարարների մակարդակով (Հայաստանի և Ադրբեջանի արտգործնախարարների և ԵԱՀԿ Մինսկի խմբի համանախագահների մասնակցությամբ) Համբուրգում դեկտեմբերի 8-ին կայանալիք ԵԱՀԿ անդամ երկրների արտգործնախարարների նիստի շրջանակում։
Մամեդյարովն ու Էյրոն քննարկել են նաև երկու երկրների երկկողմ կապերի հեռանկարներն ու ներկայիս վիճակը։
Մամեդյարովը հանդիպել է նաև ԵԱՀԿ Մինսկի խմբի նոր համանախագահ Ստեֆան Վիսկոնտիի հետ։
