Ուկրաինան կարող է դուրս գալ ԱՊՀ-ի կազմից

Ուկրաինայի Գերագույն ռադայի պատգամավորները օրինագիծ են մտցրել խորհրդարան, որի համաձայն՝ նախարարների կաբինետը պետք է ընդունի բոլոր անհրաժեշտ միջոցառումները՝ դադարեցնելու մասնակցությունը ԱՊՀ-ի մարմիններում, հայտնում է «112 Ուկրաինա» հեռուստաալիքը։

Պատգամավորներն առաջարկում են կասեցնել Մինսկում ԱՊՀ-ին կից Ուկրաինայի մշտական ներկայացուցչության գործունեությունը, դադարեցնել «ԱՊՀ անդամ պետությունների միջկառավարական ասամբլեայի համաձայնագրին Ուկրաինայի Ռադայի միանալու մասին» Ուկրաինայի խորհրդարանի վճռի գործողության ժամկետը, հետ կանչել Ուկրաինայի խորհրդարանական պատվիրակության լիազորությունները և չուղարկել Ուկրաինայի ներկայացուցիչներին ԱՊՀ-ի միջխորհրդարանական ասամբլեայի աշխատանքներին։