Բունդեսթագը երկարաձգել է Ինջիրլիքում գերմանական առաքելության ժամկետը
Գերմանիայի Բունդեսթագը երկարաձգել է Թուրքիայի Ինջիրլիքի ռազմաբազայում գերմանական առաքելության ժամկետը: Այս մասին տեղեկացնում է գերմանական Deutsche Welle-ն:
Գերմանիայի կոալիցիոն ուժերի` CDU /CSU (Քրիստոնյա դեմոկրատական, քրիստոնյա-սոցիալական միություններ) և Սոցիալ դեմոկրատական կուսակցության (SPD) կողմ ձայներով Ինջիրլիքի ռազմաբազայում գերմանական ներկայությունը կպահպանվի մինչև 2017 թվականի դեկտեմբերի 31-ը:
Բացի այդ, որոշում է կայացվել ՆԱՏՕ-ի պահանջի համաձայն Ինջիրլիք ուղարկել AWACS տեսակի ռազմական ինքնաթիռները:
Ներկայում Ինջիրլիքում են գտնվում 250 գերմանացի զինվոր, 6 «Տորնադո» տեսակի հետախուզական ինքնաթիռ և մեկ լցավորող ինքնաթիռ: Գերմանական կողմն իր ներկայությունն Ինջիրլիքում օգտագործում է «Իսլամական պետություն» խմբավորման դեմ գործողություններին մասնակցելու նպատակով:
