Թրամփի հաղթանակից հետո ամերիկացիները զանգվածաբար սկսել են հետաքրքրվել Նոր Զելանդիայով ու Կանադայով
Նոր Զելանդիայի միգրացիոն ծառայությունը գրանցել է ամերիկացի օգտատերերի կողմից իր կայքերի այցելությունների աճ ԱՄՆ նախագահական ընտրություններում Դոնալդ Թրամփի հաղթանակից հետո, հայտնում է BBC-ի ռուսական ծառայությունը։
Անցած օրերին Նոր Զելանդիայի միգրացիոն ծառայության կայքերում գրանցվել է ԱՄՆ-ից 56 հազար այցելություն։ Կայքի միջին վիճակագրական այցելությունը օրական մոտ 2 հազար է։
Բացի այդ՝ 1 օրում 7 հազար ամերիկացի քաղաքացի է կայքում նշել, թե հետաքրքրված է աշխատանքով, երկրի ուսումնասիրությամբ կամ ներդրումներով։ Դա կրկնակի ավելի է կայքում ամսական գրանցվողների թվից։
Նախօրեին Կանադայի միգրացիոն ծառայության պետական կայքը դարձել էր անհասանելի մեծաթիվ այցելությունների հետևանքով։ ԶԼՄ-ները դա բացատրում են նրանով, որ ամերիկացիները սկսել են այցելել կայքը Դոնալդ Թրամփի հաղթանակի մասին լուրն իմանալուն պես։
