Թրամփի հաղթանակը ՌԴ Պետդումայում դիմավորել են ծափահարություններով
Նորությունն այն մասին, որ հանրապետական Դոնալդ Թրամփը հաղթանակել է ԱՄՆ նախագահի ընտրություններում, Պետդումայի պատգամավորներն այսօր առավոտյան դիմավորել են ծափողջուններով։
Թրամփի հաղթանակի մասին պատգամավորներին հայտնել է Պետդումայի կրթության հարցերով խորհրդարանական կոմիտեի ղեկավար Վյաչեսլավ Նիկոնովը։
«Գործընկերներ, 3 րոպե առաջ Հիլարի Քլինթոնը ընդունել է իր պարտությունը նախագահական ընտրություններում, իսկ քիչ առաջ Թրամփը սկսել է իր ելույթը՝ որպես ԱՄՆ նորընտիր նախագահ»,- ասել է Նիկոնովը։
Պատգամավորները սկսել են ծափահարել։ Վլադիմիր Ժիրինովսկին հայտարարել է, թե Թրամփին շնորհավորական ուղերձ է հղելու։
«Մենք նրան հեռագիր կուղարկենք. «Թանկագին Դոնալդ, շնորհավորում ենք ձեզ արժանի հաղթանակի կապակցությամբ։ Տատիկ Քլինթոնը թող հանգստանա»,- հայտարարել է Ժիրինովսկին։
