ԱՄՆ-ում մեկնարկել են 45-րդ նախագահի ընտրությունները
ԱՄՆ-ում մեկնարկել են նախագահական ընտրությունները։ Քվեարկությունը սկսվել է Նյու Հեմփշիր նահանգի մի քանի ավանում և քաղաքում, հայտնում է BBC-ն։
Ժ. 00:00 EST-ին (Երևանի ժամանակով ժ. 09:00-ին) մի քանի ընտրատեղամաս է բացվել Նյու Հեմփշիր նահանգի Դիքսվիլ Նոտչ բնակավայրում։
Ավանդաբար, ավանում ընտրությունները սկսվում են գիշերը, իսկ դրանց արդյունքները հաճախ հայտնի են դառնում տարբեր հարցումների արդյունքներից առաջ։
Դիքսվիլի 4 բնակիչ քվեարկել է ԱՄՆ Դեմոկրատական կուսակցության թեկնածու Հիլարի Քլինթոնի օգտին, 2-ը՝ Հանրապետական կուսակցության ներկայացուցիչ Դոնալդ Թրամփի օգտին։ Դիքսվիլ Նոտչը հայտնի է գիշերային քվեարկության ավանդույթով։
Ավանը գտնվում է նահանգի հյուսիսում՝ Կանադայի սահմանի հարևանությամբ։ Այդտեղ բնակվում է մի քանի տասնյակ մարդ։
Կեսգիշերին բացվել է մի քանի ընտրատեղամաս Հարթս Լոքեյշըն քաղաքում ու նահանգի մի քանի բնակավայրերում։
ԱՄՆ մյուս նահանգներում ընտրությունները կսկսվեն տեղի ժամանակով երեքշաբթի առավոտյան։
