Եվրամիությունը Թուրքիայում ժողովրդավարության հետընթաց է արձանագրել
Վերջին տարում Թուրքիայում լրջորեն վատացել է ժողովրդավարության ոլորտում իրավիճակը, սակայն այդ երկիրը մնում է Եվրամիության «առանցքային գործընկերը», ասվում է ԵՄ-ին անդամակցությանը Թուրքիայի պատրաստականության մասին զեկույցում, հայտնում է DW-ն:
Եվրահանձնաժողովը նախապատրաստել է Եվրամիությանը Թուրքիայի անդամակցությանը պատրաստ լինելու՝ մինչ օրս հրապարակված ամենաբացասական զեկույցը:
«Խոսքի ազատության ոլորտում վերջին տարում ուժեղ հետընթաց է տեղի ունենում»,- այսօր գրել է գերմանական Frankfurter Allgemeine Sonntagszeitung-ը, որի տրամադրության տակ է հայտնվել Եվրահանձնաժողովի 100-էջանոց զեկույցի պատճենը, որը պլանավորվում է պաշտոնապես հրապարակել նոյեմբերի 9-ին:
Զեկույցի հեղինակները «լուրջ անհանգստություն են հայտնում» մեծաթիվ լրագրողների ու ԶԼՄ-ների փակման առնչությամբ, որը սկսվել է հուլիսյան ձախողված ռազմական հեղաշրջումից հետո:
Փաստաթղթում արձանագրվում է արդարադատության ոլորտում հետընթացը, քանի որ այդ ընթացքում աշխատանքից ազատվել է դատավորների ու դատախազների 20 տոկոսը:
Միաժամանակ, ընդգծվում է, որ Թուրքիան ԵՄ-ի կարևորագույն գործընկերն է:
