«Դեռ հնարավորություն կա «Հանրապետականին» Վանաձորում դարձնել ընդդիմադիր խմբակցություն». Քրիստ Մարուքյանը՝ այսօրվա ավագանու նիստը բոյկոտելու մասին

«Դեռ հնարավորություն կա «Հանրապետականին» Վանաձորում դարձնել ընդդիմադիր խմբակցություն». Քրիստ Մարուքյանը՝ այսօրվա ավագանու նիստը բոյկոտելու մասին

Վանաձորի ավագանու առաջին նիստը «Լուսավոր Հայաստան», ԲՀԿ և «Հայկական վերածնունդ» կուսակցությունների անդամների բոյկոտի պատճառով այսօր չի կայացել: Նշված խմբակցությունների անդամները չեն եկել ավագանու նիստին, ինչի արդյունքում քվորում չլինելու պատճառով նիստը հետաձգվել է: Նիստին ներկա են եղել միայն ՀՀԿ և ՀՅԴ անդամները, այսինքն՝ ավագանու 33 անդամներից նիստին ներկա է եղել ընդամենը 15-ը:

168.am-ի հետ զրույցում Վանաձոր քաղաքի ավագանու «Լուսավոր Հայաստան» խմբակցության ղեկավար Քրիստ Մարուքյանն ասաց, որ նախապես էլ հայտարարել են՝ Մամիկոն Ասլանյանի օգտին 4 հոգուն բացահայտելու խնդիր կար. «Այդ 4 հոգին եթե մասնակցեին, ապա բավարար էր, որ նիստ գումարվեր, և ուզում էինք տեսնել՝ ո՞ւմ միջոցով հնարավոր եղավ ընտրությունն իրականացնել: Եթե մենք չենք մասնակցում, ՀՀԿ-ն պարտադրված էր լինելու այդ 4 հոգուն ներգրավել, քվորում ապահովել և իրականացնել նիստ: Բայց ինչպես տեսանք՝ դա տեղի չունեցավ, ու ենթադրությունը մեկն է, որ այդ 4 ձայնը ստացվել էր ճնշումների արդյունքում: Հակառակ պարագայում, եթե մարդիկ իրենց ազատ կամարտահայտությամբ քվեարկած լինեին ՀՀԿ-ական թեկնածուի օգտին, որևէ խնդիր չէր լինի բացահայտվելու, դրա մասին հրապարակավ հայտարարելու, նիստին մասնակցելու ու մնացած օրակարգային քայլերն առաջ տանելու համար: Բայց այսօրվա չկայացած նիստը ցույց է տալիս, որ իրականում ՀՀԿ-ն չունի քաղաքը կառավարելու մանդատը, աջակցությունը և այդ մանդատագողությունը տեղի է ունեցել՝ որպես միանգամյա գործողություն, այսինքն՝ որևէ շարունակություն կամ հաջորդ քայլ պլանավորված չի եղել»:

Հետաքրքրվեցինք, թե որքան են պատրաստվում շարունակել նմանատիպ բոյկոտները: «Այս բոյկոտն իր առաջին պտուղը տվել է. մենք հասկացանք, որ չեն վայելում այն աջակցությունը, որի մասին ի սկզբանե խոսվում էր: Հիմա ես առաջարկել եմ հաջորդ նիստը գումարել մեկ օրակարգային հարցով. քանի որ չկա կառավարելու մանդատը, ներկայացնել հրաժարականի դիմում ու այդ մեկ հարցով գումարել նիստ: Եթե կլինի նիստ, որի օրակարգում կլինի այդ մեկ հարցը, կապահովվի մասնակցություն և քվեարկություն: Հակառակ պարագայում՝ որևէ այլ օրակարգով նիստ, կարծում եմ՝ կարժանանա նույն ճակատագրին»,- պարզաբանեց Ք. Մարուքյանը:

Նա նաև հավելեց, որ ըստ օրենքի՝ եթե նստաշրջանի ժամանակահատվածում 3 ամիս շարունակ նիստ չի գումարվում, ապա ավագանին լուծարվում է, ու նշանակվում են նոր ընտրությունները: «ՀՀԿ-ն չունի քաղաքը կառավարելու մանդատը, ու դեռ հնարավորություն կա «Հանրապետականին» Վանաձորում դարձնել ընդդիմադիր խմբակցություն»:

Գովազդ
Լրահոս
Ամենաընթերցված
ՕրվաՇաբաթվաԱմսվա
2017-11-28
Ի՞նչ կտա Հայաստանի սովորական քաղաքացիներին ՀՀ-ԵՄ համաձայնագիրը
Հայաստանում Եվրոպական միության պատվիրակության ղեկավար, Արտակարգ և լիազոր դեսպան Պյոտր Սվիտալսկին երեկ լրագրողների հետ հանդիպման ընթացքում խոսեց Հայաստան-Եվրոպական միություն նոր համաձայնագրի մասին։