Բուլղարիայում 13 միլիոն կեղծ եվրո են գտել լճի հատակին
Բուլղարացի ոստիկանները ջրամբարի հատակին հայտնաբերել են շուրջ 13 միլիոն եվրո գումարի կեղծ թղթադրամներ, տեղեկացնում է BBC-ն:
Ջրասուզակ ոստիկանները թղթադրամները ջրի տակից հանել են Լենովո գյուղից ոչ հեռու: Դրանք լճում թաքցված են եղել ամբարտակի մոտ: Մասնագետներն ասում են, որ խոսքը վերաբերում է 500 եվրո արժողությամբ թղթադրամների: Դրանք պատճենվել են շատ պրոֆեսիոնալ մակարդակով, սակայն դրանց վրա բացակայում են որոշ նշաններ:
Առայժմ հայտնի չէ, թե հատկապես որքան կեղծ դրամ է գտնվել: Գտնված թղթադրամները հաշվելու համար ոստիկանությունը նախ ստիպված կլինի չորացնել դրանք: Կեղծ դրամներով թաքստոցի գտնվելու վայրը նշել է դրամանենգների ելուզակախմբի ենթադրյալ անդամներից մեկը, որին ավելի վաղ ձերբակալել էին ոստիկանները: Նրա հետ մեկտեղ կալանավորված է եւս երկու մարդ: Նրանցից զենք են առգրավել:
