ԱՄՆ-ը ողջունել է Վրաստանի խորհրդարանական ընտրությունների «հաջող ավարտը»
ԱՄՆ-ը ողջունում է Վրաստանի խորհրդարանական ընտրությունների «հաջող ավարտը», որոնք վկայում են, որ «Վրաստանն առաջատար է տարածաշրջանում ժողովրդավարական բարեփոխումների տեսակետից»։
Այս մասին, ինչպես հայտնում է «Գրուզիա օնլայնը», նշված է Սպիտակ տան կողմից հոկտեմբերի 31-ին հրապարակված հայտարարության մեջ։ «Տարբեր քաղաքական առաջնորդները զգալի դեր խաղացին՝ կոչ անելով իրենց կողմնակիցներին զսպվածություն ցուցաբերել ընտրությունների ժամանակ, որպեսզի ընտրողներն ազատորեն կարողանային իրենց որոշումը կայացնել»,- հայտարարել է ԱՄՆ Ազգային անվտանգության խորհրդի խոսնակ Նեդ Փրայսը։
«Սակայն մեզ անհանգստացնում են բռնության և վախեցնելու առանձին դեպքերը և կոչ ենք անում պատասխանատվության ենթարկել, ինչպես նաև հավասարակշռված հետաքննություն անցկացնել՝ իրավական նորմերին համապատասխան»,- ասվում է նրա հայտարարության մեջ։
Վաշինգտոնը նաև կոչ է արել Վրաստանի քաղաքական կուսակցությունների բոլոր առաջնորդներին միասին աշխատել, որպեսզի հաջողվի հասնել Վրաստանի քաղաքացիների համար կարևոր նպատակների լուծմանը։
