«Ռուսաստանի և Ադրբեջանի ռազմավարական գործընկերության հիմքում ընկած են բարեկամական և բարիդրացիական հարաբերությունները». Պուտին
Ռուսաստանի և Ադրբեջանի ռազմավարական գործընկերության հիմքում ընկած են բարեկամական և բարիդրացիական հարաբերությունները, որոնք միավորում են ժողովուրդներին դարերի ընթացքում, ասվում է ուղերձում, որը ՌԴ նախագահ Վլադիմիր Պուտինը հղել է Բաքվում այսօր իր աշխատանքն սկսած ռուս-ադրբեջանական միջտարածաշրջանային ֆորումի մասնակիցներին։ Այս մասին հայտնում է Trend գործակալությունը։
Ուղերձը կարդացել է ՌԴ նախագահի տարածաշրջանային և օտարերկրյա երկրների հետ մշակութային կապերի վարչության պետ Վլադիմիր Չեռնովը։
Ուղերձում նշվում է, ֆորումը զարգացնում է վստահության ավանդույթները և փոխագործակցությունը, որը հիմնված է երկու երկրների պատմության ընդհանուր էջերի վրա, նպաստում է ինտեգրացիոն գործընթացներին և փոխշահավետ համագործակցությանը։
Միջոցառումն անցկացվում է Ադրբեջանի էկոնոմիկայի նախարարության և Ռուսաստանի տնտեսական զարգացման նախարարության օժանդակությամբ։
Ֆորումի շրջանակներում քննարկվելու են երկկողմ համագործակցության զարգացման հարցեր, ինչպիսիք են արդյունաբերությունը, տրանսպորտը, էներգետիկան, զբոսաշրջությունը, մարդասիրական ոլորտը։
