Իգնատի Առաքելյանը՝ ՀՀԿ-ական դառնալու մասին
Խաղողի մթերման գումարները կամաց-կամաց վճարվում են։ Այս մասին այսօր ՀՀ կառավարության նիստի ավարտից հետո լրագրողների հետ զրույցում ասաց ՀՀ գյուղատնտեսության նախարար Իգնատի Առաքելյանը։ «Որոշ ընկերությունների հետ իրենց հումքի իրացման պայմանավորվածություն կա, իմիջիայլոց, ինքնարժեքից ցածր գնով։ Եկել են այդ համաձայնությանը, որպեսզի մարեն պարտքերը։ Պարզապես ժամանակ է պահանջվում, որպեսզի իրացվի և պարտքերը մարեն»,- ասաց նախարարը՝ նշելով, որ երեկվա դրությամբ՝ գյուղացիներին պարտքի գումարի չափը կազմում է 500 մլն դրամ, այն մարելու վերջնաժամկետ սահմանված չէ, գործընթացը սկսվել է։
Հարցին՝ արդյոք չի՞ վախենում, որ կարող է գործիք լինել Հանրապետական կուսակցության վերարտադրման համար, Իգնատի Առաքելյանը պատասխանեց, որ այսօր գործում է շղթա, և յուրաքանչյուրն այդ շղթայում գործիք է, որպեսզի տնտեսությունը, գյուղատնտեսությունը, բոլոր ոլորտները զարգանան։ «Եթե Հանրապետականն ուզում է, որ ինչ-որ բան զարգանա, դրա մեջ վատ բան կա՞»: Հարցին՝ արդյոք հնարավո՞ր է՝ ՀՀԿ անդամ դառնա, Իգնատի Առաքելյանը պատասխանեց. «Հնարավոր է, եթե առաջարկ լինի, եթե դա կնպաստի աշխատանքի արդյունավետությանը»։
