«Ռուսաստանը պատրաստվում է վաճառել ոսկու և ալմաստի իր պահուստները». «Իզվեստիա»
Տնտեսական ճգնաժամը ստիպել է Ռուսաստանի ֆինանսների նախարարությանն անել մի բան, ինչը չէր արվել անցած դարի 90-ականների ճգնաժամից՝ սկսել վաճառել պետական հիմադրամի ոսկու և ալմաստի պաշարները։
Միայն այդկերպ, կարծում են նախարարությունում, հնարավոր է ինչ-որ կերպ համալրել երկրի բյուջեի վատ վիճակը, գրում է ռուսական «Իզվեստիա» պարբերականը։
Միաժամանակ, ՌԴ ֆինանսների նախարարությունն այս տարի որոշել է կրճատել պետական հիմնադրամի կողմից թանկարժեք մետաղների և քարերի գնման պլանները՝ 12 միլիարդ ռուբլուց մինչև 5 մլրդ ռուբլի կամ 2.5 անգամ։
«Իզվեստիայի» աղբյուրը գերատեսչությունից հայտնել է, որ միաժամանակ, սպասվում է ոսկու ու ալմաստների պահուստների լայնամասշտաբ վաճառք՝ գանձարանի համալրման նպատակով։
Հոկտեմբերի 1-ի դրությամբ ՌԴ ֆինանսների նախարարությունը իրականացրել է թանկարժեք մետաղների և քարերի գնման պլանի ընդամենը 19,9%-ը՝ այդ նպատակով ծախսելով 2.4 միլիարդ ռուբլի՝ օրենքով նախատեսված 12 միլիարդ ռուբլուց։
Միաժամանակ, ՌԴ ֆինանսների նախարարությունը մոտակա 3 տարում մտադիր է ավելացնել քարերի և թանկարժեք մետաղների վաճառքի ծավալները։
Նախարարության որոշումը հարուցել է մասնագետների տարակուսանքը։ Նրանց խոսքով՝ պետական ալմաստներն ու ոսկին վաճառելն այն պարագայում, երբ դրանց համաշխարհային գները աճում են, անհեռատես քաղաքականություն է։
