Գագիկ Ծառուկյանը` վարչապետի ու «մուտիլովշչիկների» մասին
«Մեր վարչապետին ճանաչում եմ, հարգում եմ, գնահատում եմ, և, ամենակարևորը՝ մի բան ասեմ, որ պարոն վարչապետն ինքը գիտի՝ ինչ է անում: Դուք անհոգ եղեք»,- այսօր լրագրողների հետ զրույցում հայտարարեց «Բարգավաճ Հայաստան» կուսակցության նախկին առաջնորդ Գագիկ Ծառուկյանը` պատասխանելով հարցին, թե ինչպե՞ս է վերաբերվում ՀՀ վարչապետ Կարեն Կարապետյանին:
Գ. Ծառուկյանը նշեց, որ պատրաստ է անհրաժեշտ աջակցությունը ցուցաբերել` երկրի, ժողովրդի բարեկեցության համար: Նրա խոսքով` քաղաքականություն են մտնում երևալու համար, իսկ ինքը դրա կարիքը չունի:
«Պարոն Ծառուկյանը, նորից եմ ասում, Հարվարդ չեմ ավարտել, ես զրոյից եմ կայացել, ձեռս պուլսի վրա է, ես զգում եմ ամեն ինչը: Ես անգիր արած բառեր չեմ ասում»,- ասաց նա:
Նա հիշեցրեց 2009թ. իր հարցազրույցը, որում ասել է, որ ճգնաժամի ժամանակ հարկեր չեն ավելացնում, պահանջներ չեն խստացնում, ընդհակառակը` թեթևացնում են, հնարավորություն են տալիս, որ մարդիկ կարողանան գոնե գոյատևել, ապրել, նաև ասել է, որ բանկային համակարգերը լոմբարդներ են, Հայաստանում ով դիմի բանկային համակարգին՝ սնանկանում է: Ծառուկյանի խոսքով` ինքը բոլոր ոլորտների համար գնահատականներ տվել է, ասել է՝ «ինչ պետք է անել մարդկանց շնչել տալու համար»:
Իր կառուցած առևտրի կենտրոնի հարցի շուրջ Գ. Ծառուկյանը վիճաբանության բռնվեց լրագրողներից մեկի հետ: Լրագրողը նշեց, որ այդ առևտրի կենտրոնում առևտրականները ևս տաղավարների կառուցման գործում մասնակցություն են ունեցել:
«Դու մուտիլովշչիկ ես, քո երեսից էսօր ժողովրդի 95%-ը վարկի տակ ա, հենց քո ուղարկողն ա արել: Բայց Ծառուկյանն էս ժողովրդի համար մտածող, ամեն օր կատարող ա»: Ծառուկյանն այնքան բորբոքվեց, որ լրագրողին անգամ «շպիոն» անվանեց: «Ես կառուցել եմ, իրենք ռեմոնտ են արել»,- լրագրողին հակադարձեց նա:
Վերադառնալով քաղաքականության թեմային` Գագիկ Ծառուկյանը նշեց, որ 2 օր առաջ իր տան մոտ հավաքվել էին ԲՀԿ-ականներ. «Անընդհատ հավաքվում են, ասում են, չգիտեմ ինչ են անում: Հավաքվել են իմ կուսակցության ընկերները, ասում են, որ ժողովուրդը ուզում ա գա, կարիքը ունի, բայց ես հենց այնպես քաղաքականություն մտնողը չեմ»:
«Դրսում Ծառուկյանին ավելի շատ են հարգում, սիրում՝ որպես մարդ, քան որոշ մուտիլովշչիկներ, որ իմանալով, որ Ծառուկյանն իրանց կպատժի, 2 անգամ զգուշացր… որովհետև իրանք ժողովրդի արյուն ծծող են: Ժողովուրդն էսօր այդ օրին է հենց իրանց երեսից: Անունները դուք մտածեք, կարող եք ինտերնետից տեղեկանալ կարկառունների մասին»,- ասաց Գ.Ծառուկյանը:
Մանրամասները` տեսանյութում:
