Թեհրանի միջնորդությունը ԼՂ հակամարտության կարգավորման հարցում օրակարգում չէ. Իրանի ԱԳՆ
Լեռնային Ղարաբաղի հակամարտության կարգավորման հարցում ոչ մի երկիր չի կարող այնպիսի դրական դերակատարում ունենալ, ինչպես Իրանը, սակայն ներկայումս Թեհրանի միջնորդությունը օրակարգում չէ։ Այս մասին, ինչպես հայտնում է APA-ի թեհրանյան բյուրոն, հայտարարել է Իրանի ԱԳՆ խոնակ Բահրամ Քասեմին։
Նրա խոսքով՝ Իրանը ԽՍՀՄ-ի փլուզումից հետո միջնորդական կարևոր դեր է կատարել Լեռնային Ղարաբաղի հակամարտության կարգավորման հարցում։
«Մենք վերականգնել ենք կրակի դադարեցման առաջին լուրջ ռեժիմը Լեռնային Ղարաբաղում։ Սակայն որոշ պատճառներով ռեժիմը շարունակական չեղավ»,- ասել է նա։
Բահրամ Քասեմին ասել է, որ Իրանի նախագահ Հասան Ռոուհանիի՝ Երևան կատարելիք այցի ժամանակ քննարկվելու է ոչ թե Իրանի միջնորդությունը ԼՂ հակամարտության կարգավորման գործում, այլ Իրանի և Հայաստանի երկկողմ հարաբերությունները։
