Ֆրանսիական իշխանությունները փակում են Կալեում ներգաղթյալների տխրահռչակ ճամբարը
Ֆրանսիական Կալեում ավելի քան 1200 ոստիկան և իրավապաշտպան մարմինների աշխատակիցներ են մասնակցում անօրինական ներգաղթյալների փամբարի փակմանը, որը հայտնի է որպես «Ջունգլի»։
Ճամբարում ապրում է մինչև 7 հազար մարդ, որոնցից շատերը սպասում են Մեծ Բրիտանիայում հայտնվելու շանսին, հայտնում է BBC-ն։
Ապամոնտաժումից մի քանի օր առաջ ֆրանսիական իշխանությունները թռուցիկներով զգուշացրել էին ճամբարի բնակիչներին գրանցվել հատուկ ստեղծված կետերում, որտեղից նրանց կտեղափոխեն Ֆրանսիայի այլ քաղաքներում տեղակայված փախստականների ընդունման կենտրոններ։
Փախստականների մի մասն արձագանքել է կոչին, սակայն իշխանությունները մտավախություն ունեն, որ շատերը կոչը կանտեսեն, քանի որ ճամբարում գտնվողների հիմնական նպատակը Մեծ Բրիտանիա տեղափոխվելն է։
Անցած հանգստյան օրերին ճամբարի տարածքում լուրջ բախումներ էին տեղի ունեցել ոստիկանության և դրա բնակիչների միջև։
