Հանրահայտ դասընթացավար Սքոթ Թորնբըրին դասախոսություններով հանդես կգա հայ ուսուցիչների համար

Բրիտանական խորհրդի հայաստանյան մասնաճյուղն ուրախ է հայտարարել, որ ուսուցիչների վերապատրաստման 2016թ.-ի ծրագրի շրջանակում Հայաստանում կհյուրընկալի Սքոթ Թորնբըրիին, ով ուսուցիչներ վերապատրաստող անվանի և հանրաճանաչ մասնագետ է, գրող և բանախոս: Վերջինս նոյեմբերի 18-ից 20-ը զրույցներ և վերապատրաստման սեսիաներ կվարի Հայաստանում անգլերեն դասավանդողների համար:

Անգլերեն դասավանդողներն ու ուսուցիչները կարող են մասնակցել նրա հինգ դասախոսությանը և ծանոթանալ ոլորտում տեղի ունեցող վերջին նորարարություններին, ստանալ իրենց հուզող հարցերի պատասխանները և կիսել իրենց փորձառությունը:

Սքոթ Թորնբըրին ուսուցիչ է և ուսուցիչներ վերապատրաստող, ով ունի Ռիդինիգի համալսարանի մագիստրոսի կոչում և շուրջ 30 տարվա փորձ՝ անգլերենի դասավանդման ոլորտում: Ներկայումս նա TESOL մագիստրոսական ծրագրի ուսումնական պլանի համակարգողն է Նյու-Յորքի Նյու Սքուլ համալսարանում: Մինչ այդ նա զբաղվել է դասավանդմամբ և ուսուցիչների վերապատրաստմամբ Եգիպտոսում, ՄԹ-ում, Իսպանիայում, որտեղ և հիմա բնակվում է ու իր ծննդավայր՝ Նոր Զելանդիայում: Նա հեղինակել է ուսուցիչների համար նախատեսված մրցանակակիր մի շարք գրքեր լեզվի և մեթոդաբանության, ինչպես նաև հետազոտություններ ու գրքերի  գլուխներ՝ լեզվի դասավանդման  թեմաներով: Նա Cambridge դասագրքերի՝ ուսուցիչների բազմաթիվ ձեռնարկների խմբագիր է (CUP): Նա նաև dogme դասանավանդման մոտեցման համահիմնադիրն է: Իսկ ներկայումս հանդիսանում է Ուսուցիչների վերապատրաստման միջազգային ինստիտուտի  (iTDi) գործընկեր, որը այդ բնագավառի բարելավման առցանց կենտրոն է:

Բոլոր սեսիաները բաց են հետաքրքրված ուսուցիչների ու մանկավարժների համար: Միջոցառման մուտքն անվճար է: Այնուհանդերձ, հարկավոր է գրանցվել նախապես՝ լրացնելով առցանց գրանցման ձևաթուղթը:

Լրացուցիչ տեղեկությունների համար այցելեք այստեղ.: